Մեդիաօլիմպիադա <<Ձմեռ>> 2012
Առարկա` հայոց լեզու
10-15 նախադասությամբ կարծիք արտահայտե՛ք մեդիաօլիմպիադայի, դրա կազմակերպման, առավելությունների ու թերությունների մասին: Տեքստում օգտագործե՛ք մեկական թևավոր խոսք, դարձվածք ու շրջասություն:
Չեմ սիրում հաշվել, այնպես որ իմ կարծիքը կշարադրեմ` առանց նախադասությունների հաշվիչը միացնելու: Իսկ դուք, հետո, եթե ցանկանաք, կարող եք նույնիսկ վանկերի քանակը հաշվել:
Ինչպես գիտենք, առաջին օլիմպիադաները` Օլիմպիական խաղերը, ստեղծվել են Հին Հունաստանում: Այդ խաղերին մասնակցում էին միայն ուժեղագույնները, իսկ հաղթողները զանազան արտոնություններ էին ստանում և արժանանում հավերժական փառքի: Այդ խաղերն անցնում էին հինգ տարին մեկ անգամ, բայց այդ խաղերի ընթացքում արգելված էին պատերազմները:
Մեր ժամանակներում մարդիկ ագահ են: Հինգ տարին մեկ անգամ մրցելը ժամանակակից ատլետներին քիչ թվաց, և հատուկ նրանց համար հորինվեցին Ձմեռային Օլիմպիական խաղերը: Բայց նույնիսկ Համաշխարհային Օլիմպիադայի հանձնաժողովի հնարամիտ անդամները չէին կարող պատկերացնել, որ կարելի է տարին չորս անգամ օլիմպիադա անց կացնել:
Լավ, ինչի՞ համար, ի՞նչ նպատակով: Որ հետո ասեք, որ գո՞րծ ենք անում, այսպիսի սուպերդպրո՞ց ենք: Լսեք, ի՞նչ սուպերդպրոց, եթե ձեր այս մեդիաօլիմպիադաներին մասնակցում են ոչ թե լավագույն աշակերտները, այլ բոլոր ցանկացողները: Ներեցեք, սխալվեցի, մասնակցում են բոլորը, չէ՞ որ մեզ վախեցնում են. <<Այ մեդիաօլիմպիադային չես մասնակցի, քառորդներդ չե~նք նշանակի>>:
Մասնագիտական առարկաներին պարտադիր մասնակցելը հասկացանք, բա հինգ ցանկացած առարկայի պարտադիր մասնակցությունը ո՞վ հորինեց: Ընդ որում, ուսուցիչների գլխավոր արգումենտն այս պարագայում դարձել է այն, որ մեզ, видите ли, ոչ ոք չի ստիպում մի առարկայից ներկայացված բոլոր առաջադրանքները կատարել, այսինքն` տրված տասը հարցերից աշակերտը կարող է պատասխանել միայն մեկին, այն էլ այն մտքով, որ փայլուն պատասխան նրանից ոչ ոք չի ակնկալում:
Քանի՞ անգամ կարելի է կրկնել, հարգելիներս, քանակը որակ չի տալիս: Կկատարեմ տարբեր հինգ առարկաների առաջադրանքները, այնպես կկատարեմ, որ ստուգողների մազերը բիզ-բիզ կկանգնեն: Որ ասեն. <<Էս անգրագետն ո՞վ է, մեր դպրոցո՞ւմ է սովորում>>: Հաճելի՞ է այդպիսի աշխատանք ստուգելը, այն էլ հինգ տարբեր առարկաներից: Իսկ այդպիսի աշխատանքներ շա~տ են լինելու, որովհետև բոլորը` լավագույններն ու վատագույնները, ուղարկելու են իրենց աշխատանքները, որ քառորդները մի կերպ փակեն:
Դարձվածք և շրջասո՞ւյթ էիք ուզում: Ասեմ: Հարգելիներս, դուք մեզ արջի ծառայություն եք մատուցում: Մի մատուցեք այն, համ մեզ եք տանջում, համ էլ ձեզ: Այսպես ասած, սիզիփոսյան աշխատանք եք անում, նույնիսկ ավելի վատ (Սիզիփոսը գոնե իր քար գլորելով ոչ ոքի չէր խանգարում):
Վերջացնե՞մ: Երևի: Ասելիք շատ կա, բայց ասելու տրամադրություն չկա: Համ ասում եք կարծիք հայտնեք, համ էլ այնպես անում, որ մարդ ցանկություն չունենա կարծիք հայտնել:
Комментариев нет:
Отправить комментарий